為食遊, 黃金海岸, 屯門

 

今日大細佬一家又約我帶老父去食大家都中意食嘅嘢.....就系容龍別墅嘅海鮮.

 

在老人家的記憶中, 呢間係佢後生時可望不可即嘅食肆. 其實現在一樣都唔平. 不過, 負擔得起, 帶老人家去高興與享受一番, 系大家嘅福氣. 唔計得咁多.

 

難得唔單止老人家, 包括我, 都中意食呢度嘅海鮮. 就連我13歲嘅姪女都非常享受. 食到唔識收手兼'攤攤腰', 勁誇張 ;)

 

有朋友話自己去三聖村買海鮮拿去整會平些. 弊在我地唔系常客, 邊間海鮮好同抵都唔知. 咁就不如交俾酒家一手包辨免傷神. 反正, 數系大家都識計嘅. 佢無理由殺雞取卵, 擋客無回頭架.

首先唔洗問亞貴, 梗叫'砵酒焗蠔'. 大家至愛. 就連我對蠔一般都中意食. 大隻兼好味(個日呢味一上台, 來不及起機....個相機, 大家鬧著玩已急急揀最大個隻, 哈哈).

其他幾味都超好食. 乳豬真系脆兼好味. 搞到高膽固醇嘅我都忍唔到口. 牛柳粒系細姪女嘅至愛. 蒜蓉飽系全世界至愛, 而大姪女中意食個蛋白飯, 食到唔知飽, 好搞笑.

當日唯一失敗之作系'辣酒煮花螺'. 本來細佬唔食辣唔叫, 但愛女中意, 加之愛妻號, 姑且叫個. 點知太硬.

今次呢餐知價錢啦, $2150. 都唔算太貴. 以貨及質論價, 好過市區價錢相若嘅半圍餐.

 

 

 

 

蒜蓉飽, 芝士牛油焗龍蝦, 蛋白飯, 乳豬, 牛柳粒

容龍別墅

食完個 early dinner, 仲未夠六點. 加之無理由千哩迢迢只為吃一餐. 所以飯後細佬提議去黃金海岸散步消化吓. 讓小朋友玩吓沙.

嘩, 真唔知原來呢個海灘咁熱鬧. 夕陽斜照, 海面金光閃閃. 而出名嘅黃金海岸酒店就係沙灘前. 如果在早晨或黃昏, 人潮散去, 才去漫步, 會係唔錯嘅環境.

當然, 熱鬧亦有熱鬧嘅風情, 一家大小, 或三三兩兩, 都好有溫馨一面.










金光閃閃海面泛舟嘅係救生員